Tag 3 Wallis

Hitte isch di Königsetappa ufum Plan gstandu. Va Innertkirche uf 625 m.ü.M uf die Grimsla uf 2‘165 m.ü.M. Das ganza isch verteilts uf knackigi 25 Kilometer.
Gstartet siwer hittu meh oder weniger frischi z’Innertkirche. Diversi Bsüecher (Abteilig Maschinetechnik!  Merci Hosi, Mäsi und Robel) und z’Barli hend iiresch Biitrag derzüe gleischtet, dass summi nit gat ganz zer Ziit üsum Näscht sind cho.

D' erschti Astiigig hed de, wie gester scho, bald wieder gezeigt, weli Persone va Blatre geplagti sind. Trotzdem hend de alli bis uf Güettanne durchgebisse, wanisch der Gitz Lukas (Merci Luki ;-)) mitme super Apéro in Empfang gno het.

Der wiiteri Verlöif vaner Etappa isch eigentli schnäll erklärt: Steil, leng und dank super Wätter öi zum erschtu mal richtig waru. Sunnucrème isch genau so gfrägti gsi wie es Glasji Wiisse bi de diversu Apèros.

Immer meh hetmu aber de gmerkt, dass di bishergigu Kilometer nit spurlos ane Teilnähmer sind verbii gangu. Di gresser Mittagspause im Handeck het de ghulfu nomal alli Chräft z’bündlu und d’letschtu Stiigige ver uf du Pass in Agriff znäh.

Glicklich und erschöpft heiwer jetzt hie obena z’erschtesch mal uf iischer Reis Walliser Bodu erreicht! D’Freid bi summe Liit isch dermassu gross gsi, dass schi schich, natirli nummu us dum eifachu Grund dum Muskelkater vorzbeuge, der Gump inu Totesee gwagt hend. Und lüüt de Reaktione wird der See schiinem Name grächt. Zitat: Wed da üssa chusch läbt nix me! Ver schich das bildlich vorzstelle, im See hets no diversi Ischscholle kä…

More geits de uf iischer erscht Etappa im Wallis witer uf Reckinge. Jetzt giz zersch mal eppis z’Nacht.

Statistik

Gluffni Schritta:
23‘422 (Total 63‘075)

Tagestipp vam Steffi:
1. Muskelentspannigs- und Fiechtigkeitscrème bringunt nix bim Wolf

Held vam Tag:
Der Toni: E vellige Kampf heder kä! Aber der Burscht mag biisse

Anzahl Blattre:
3 va hitte plus di 7 was geschter scho gigäh het

Anzahl Tüütera:
16 Auto
0 Velo
17 Camion (vellig Büwstell hie obena)
7 Postautohymne
Total: vellig es paar Tüütera