Durch z’Goms

Hittu is va Reckinge uber Bellwald uf Fiesch gange. Vane Kilometer här isch öi hittu z’Programm ehner gmietli gsi. Durch du Abstächer uf Bellwald, het de aber öi die Etappa nomal gat eso e gwissi Wirzi verwitscht.

 

Gstartet siwer nacheru ehner churzu Nacht z’Reckinge bi der Famili Imbode. En Blick ind Rundi het gezeigt, dass bi summe d’Strapatze vane Ubernachtigsstätte ditlich weniger spurlos verbii gähnt weder d’Löifstrapatze. Mit eme Vitaminpäckli ( Aprikose, Epfla und Sandwich) ver die Person wa z z‘morgu verschlafu het (alias lö Presi), siwer de in Richtig Niederwald üfgebroche. Merci nomal der Famili Imbode ver die Hammer Ubernachtigsmeglichkeit und die Gaschtfröindschaft.

Begleitet hend iisch hitte der ganz Tag d’Eltre vam Märki. Schi hend schich das Erläbniss Rückreis nit welle entgah. Lang hensch de nit miesse warte, ver z’merke warum dass wier e Wucha brüche ver die Distanz va Luzäru uf Üsserbärg: Z’Selkinge hets bi der Grossmüetter va Camil’s Kolleg e feine Wälsche Apéro mit Chäs, Wii, Brot und allem was öi so brücht gegä. Merci Villmal der Famili Payn.

Dum Rottu entlang is de wiiter in Richtig Niederwald gangu. D’Sunna hetnisch wie erwartet hitte alles abverlangt. Chopfbedeckige, Sunnucreme und gnüeg Flüssigkeite sind dringendsch z’empfählu gsi.

Z’Niederwald siwer de uf du Waldwäg in Richtig Bellwald gstartet. Der Astiig hetnsich einiges abverlangt und üfgezeigt, dass mu halt gliich scho der 5-tisch Tag uf de Fiess isch.

Als Belohnig hets de bi der Famili Paris es Hammer Mittag gegäh: Bratu vam Grill! Merci villmal der ganz Famili ver die super Mittagspause. Wier chäme gäre wieder ;-)

Am Namittag is de drum gangu, die verbliibende Höhumeter va Bellwald uf Fiesch hinner iisch z’bringe. Ver di gschundunu Fiess e velligi Tortour. Zum Glick hets de uf halbem Wäg es Apéro vam Abgottspon Kili gigä! Öi dier es härzlichs Vergältsgott! Bi der Pause isch de en Interessanti Beobachtig gmacht worde: Weme inere 180°-Kurva e Pause macht, hend d’Autofahrer anschiinend z’vill z‘tüe mit Kupplu, ilenke, und Gäng wächslu, so dass de nimme gat ver vill Huupera glengt het. Ver d’Statistik üfzbessru siwer de z’Fiesch and Höiptstrass gwäxlet. Z’Resultat gsehder unnena.

Mittlerwiile siwer z’Fiesch im Hotel Kristall acho und mächenisch zwäg ver uf Lax anu Comedyabu vam Gommer Openair! Äs wartet es feins z’Nacht und güeti Unenrhaltig mim Marco Rima. Wenernisch ufem Gländ süechet, sellti nit so schwär sii iisch z’erkenne. 12 Hächtu mit gliichem T-Shirt wa hinkund und de Fahnu derbii hend.

Statistik

Gluffni Schritta:
12‘526 (Total 91‘649)

Tagestipp vam Steffi:
Ohni Liecht is nit liecht und ohni Leitra bisch leid dra.
 

Held vam Tag:
Z’Schalli: Wills der ganz Tag gebrücht het, verschi z’Regeneriere.

Anzahl Blattre:
E monsterblatra wa nöi isch derzüecho, plus die bestehende vane letsche Täg

Anzahl Tüütera, alles innerhalb va 300 Meter:
16 Auto
1 Camion / Bussa