Wier si gstartet

Hitte is sowiit gsi. 12 tapferi Absolväntu vaner Hochschüel Luzäre hend der lang Heimmarsch inz Wallis unner di Bei gno.

Nach dum obligatorische Gruppufoto vor dum Torboge ufem Bahnhofsplatz z’Luzäre, heiwer de gat diräkt z’Schiff unner d’Walliserflagga gstellt und si in Richtig Alpnachstad üfgebroche. Dank de obligatorische Apéros ufum Schiff, isch de die Reis öi rächt schnäll z’End gsi.

Dank dum unnermiedliche Iisatz vam Mättu, heiwer de z’Alpnachstad chennu Grilliere und der grebschti Hunger stille. Gluffni Distanz zu dem Ziitpunkt: gschätzti 124 m. Und scho hend schich ersti Tendänze in Sache Blatruproduktion la erkenne. Äs git in iischer Gruppa vier Schüeh Typu:
1. Der Klassisch Halbhoch, sid Jahru igluffus, und kein Problem zum löife.
2. Der klassisch Halbhoch neu, wie z’Nummer eis, aber no nie akäh. Blatrupotential rächt hoch
3. Der klassisch Hoch, stiigisufeschte Wanderschüeh mit null Fädrig, derfir mit innufüeter. Blatrupotential: null will igluffus, Ermiedig: 100%
Und de giz da no der Typ 4: Schüeh deheime im Wallis im Schaftji la liggu, will da geitzne güet. Derfir jetzt mit de Schicku Stadtlatsche uf d’Reis ga! 

Na dum Z’mittag heiwer de d’erschtu Meter unner d’Fiess gno…und prompt scho d’erschtusch Abzwiigig verpasst. Aber kein Problem ver ische Wanderfiehrer Camille aka le Welsch. Durch en halbe Urwald heiwers de zrug uf du Wäg gschafft und si so no rächtziitig bim Rohrer Dani (Team Maschinetechnik) zum Apéro erschine. Ab jetzt isch klar: Schnapskaffe chamu definitv öi mal am Namittag eis näh  ;-) 

Mittlerwiile siwer z’Giswil iner unerkunft acho, und hei scho chräftig z’Nacht gspisu. More startewer de zum Agriff uf du erschtusch Pass (Brünig)

Speziell: Abgottspon Roger het di erscht Etappa mit iisch mitgluffu, ver schiini Heimreis vam Jahr 2012 z’kompletiere

Statistik

Gluffni Schritta:                9‘968
Tagestipp vam Steffi:        1. Tiet immer d’Fiesnägel schniide. Susch chämendsch blaui…
                                     2. Je necher das z’Fäscht va dinem Deheime isch, desto glaffner darfsch                                           Autofahre
Held vam Tag:                   Der Omura, wa schiini Wanderschüeh im Wallis vergisst.
Anzahl Blattre:                  4 va hitte, summi hend scho 3 mitgno uf d’Reis
Anzahl Tüütera:                23 (daderfa 5 ZH’er, Chapeau!!!)
                                          1 Velo

Rechts Schuhe vom Held des Tages